الجيل السعيد

إحنا آخر جيل إتعلم اللعب فى الشارع وطلعنا محترمين
إحنا أول جيل بدأ يلعب فيديو جيم وإتفرج على الكارتون بالألوان, وإتفسحنا في الجناين .
إحنا جيل القميص الكاروهات والبيجامات المقلمه والتايير
إحنا آخر جيل كان بيسجل الأغانى من الراديو والتلفزيون , وكنا بنسمعهم على الـWalkMan
إحنا جيل الضحكه الصافيه
إحنا إتعلمنا إزاى نبرمج الفيديو قبل أى حد , إحنا اللى لعبنا على الأتارى و سوبر وماريو
احنا جيل زينا وهرقليز و اول جزء من عائله ونيس وبوجى وطمطم وعمو فؤاد و مازنجرز وسلاحف النينجا وكابتن ماجد والبوررينجرز وعروستى
إحنا اللى شفنا الإنترنت على سرعة 56 ك/ب بفاكس مودم وكنا بنفتح صفحة واحدة بس
إحنا جيل شرايط الكاسيت الاصلى و التقليد
إحنا اللى كنا بنسافر فى العربيات اللى من غير حزام آمان ولا كيس هوا
إحنا اللى عيشنا من غير محمول وكنا بردوا على إتصال ببعض
إحنا اللى كنا بنأجر العجل ونجرى بيها من غير فرامل
إحنا لا شفنا بلاى إستيشن ولا تليفزيون فيه أكتر من 100 قناة
إحنا لا شفنا شاشة مسطحة ولا 3D ولا صوت مجسم ولا Mp3 ولا Ipod
إحنا آخر جيل كان بيقضى وقت فراغه فى قراءة قصص طويلة , رجل المستحيل ونوسه لوزة تختخ عاطف محب وغيرها
احنا اللي كنا بنستني برنامج طلباتك ايه من الخميس للخميس عشان نتفرج علي الكليبات وتاكسي السهره ومواقف وطرائف وعالم البحار والعلم والايمان للدكتور مصطفي محمود واليوم المفتوح يوم الخميس و الشعراوى بعد صلاه الجمعه
احنا الجيل اللى كنا بنصحى يوم الجمعه نتفرج على برنامج سينما الاطفال لعفاف الهلاوى وبعدها نشرة اخبار الاطفال وبعدها نتفرج على سر الارض
إحنا اللي كنا بنلاقى الربع جنيه ف الكارتيه والشيبسى
إحنا الجيل اللي كان بيستني الفيلم الهندى كل عيد , مرتين في السنة , وهما هما نفس الأفلام
إحنا الجيل اللي كان بيلعب كورة حقيقى مش بلاى ستيشن
إحنا آخر جيل عرف طعم النوم في الطفولة بعيد عن الموبايل واللابتوب والدش و الـ MP3
إحنا الجيل اللى عاشر اول موبايل نزل
إحنا اللى كنا نستنى رمضان يجى بسرعة عشان نلم من العماره كلها فلوس ونجيب زينة رمضان ونعلقها مع بعض , ونتفرج على عمو فؤاد و نسمع الشعراوى قبل الفطار نستنى لمة العيلة و نفطر على بوجى و طمطم و بكار و بعد شوية نشوف فطوطة و نيللى و شريهان
إحنا اللى كنا بنستنى الفيلم الاجنبى كل خميس ع القناة التانية
إحنا اللى كنا عايشين من غير فيس بوك ولا تويتر ولا سكاى بى
إحنا اللي كنا بنحلم نشوف الدنيا عاملة إزاى بعد نص الليل لأننا عيشناه نايمين
إحنا الجيل اللي اتربى على اسمها نعم مش ايه

إحنا جيل البرائه والطفوله اللى بجد.. احنا جيل قضينا أحلى أيام عمرنا ويارتها دامت و فضلنا صغيرين