لماذا يكتئب الاطباء

لماذا يكتئب الاطباء
…
ملحوظه : حجم الاطباء و الطبيبات اللى اعرفهم مكتئبين يعدى ال 70 % من زمايلى مع اختلاف ظروفهم الاجتماعيه ( مسافر – جوا مصر – متجوز – استشاري – اخصائى)
.
1- النجاح اهم من المتعة :
فى ثانويه عامه مباراة مهمه بين الاهلى و الزمالك قبل الامتحان بيوم ….تقريبا معظم الاطباء مش هيتفرجو على الماتش لان فى امتحان مهم ….فاستطاع ان يلغى متعته مقابل نجاحه ……فى حين ان معظم زمايلنا من الكليات التانيه بيتفرج على الماتش حتى لو مش هيراجع الماده
القصه دى بتصاحب الاطباء حتى فى جوازتهم ….ممكن ميتجوزش البنت اللى بيحبها ( المتعه ) …مقابل انه يتجوز جوازه صالونات احسن ( نجاح) …اتعود على كدا…..ممكن يسافر عشان يدخل فلوس اكتر ( نجاح ) مقابل يسيب اهله و اصحابه ( متعه)
و المتعه سر من اسرار الاقبال على الحياة
….
2- الطموح :
الطموح حاجه جميله و بنحاول نخلى الناس كلها عندها طموح بس كل شئ يزيد عن حده ينقلب لضده احيانا
…
3- المقارنه :
الدكتور من و هو فى المدرسه متعود على المقارنه و المنافسه ( مين هيطلع الاول على الفصل ) …و المقارنه مهلكه نفسيا
…
4- ذو العقل يشقى فى الحياة بعقله :
زى ما قال الشاعر ….معظم الاطباء مستوى الذكاء بتاعهم كويس و بالتالى مجرد ما يفكر فى الحياه بيكتئب اكتر
…..
5- البيئه المحيطه :
صاحب جميل الروح تصبك عدوى جماله …..تخيل العكس بقى ان حضرتك شغلك كله عباره عن ناس عماله تتاوه و دموع و صريخ و تحمل خبر وفاة لاهل مريض …
….
6- النبطشيات. On call:
عايز تقتل اى انسان معنويا و نفسيا طول عمره و تلغبطله نومه مدى الحياه …..اديله سنتين تلاته يشتغل بعد الساعه 12 بليل
…..
7- القرارات المصيريه : الطبيب كل يوم بياخد قرار كل حاله مريض عباره عن سؤال عايز اجابه ….مش بيشتغل زى استاذ ( ابراهيم ختامه ) وظيفته بس انه معاه الختم بتاع الجمهوريه بيمضى للناس .
….
8- الدارسه طويلة الامد :
فكرة انك تبقى عندك 40 سنه و لسه بتذاكر و بتروح الامتحان خايف …مقابل ان كل الناس خلصت دراسه عندها 22 سنه مرعبه …و بعدين لما 40 سنه تاخد الاجازه الكبيره …..هتروح فين ( الملاهى مثلا )
….
9 – العزله عن المجتمع :
عدد ساعات شغل طويله بتخليك معظم اليوم لاما فى العياده لاما شايل نبطشيه 24 ساعه و من اسباب السعاده فى الحياه الارتباط بالاهل و كذلك فهم الناس ….تلاقى الدكاتره اكتر ناس كمان بيضحك عليهم من اى صنايعى او صاحب مهنه…و دا بيدايقهم جدا لان بيحس انه ذكى و مع ذلك بيضحك عليه كتير
…
10- طبيب العائله المقصر :
غالبا اكتر واحد العيله بتساله عن كل حاجه حتى لو قولتلهم ان حضرتك تخصص جوده او مكافحة عدوى ….انت فاهم فى كل حاجه و لازم تيجى معانا عند كل دكتور و تبقى فاهم ….و غالبا هتطلع مقصر بردو فى الاخر
….
طيب و الحل
فى حاجات فى ايديك و حاجات لا
بس اهم حاجه
1- حاول تستمع فى حياتك متاجلش المتعه ….
2- مش كل حاجه نجاح بعض الفشل ممتع
3- لازم تعرف توقف نفسك امتى والا هتفضل تجري طول حياتك ,,,حدد هدف مادى توصله …او هدف زمنى
4- متقارنش نفسك بحد
5- الاهم : جدد نيتك دائما لله …الطب ممكن يكون ابتلاء فعلا بس فى نفس الوقت نعمه من الله بتاخد عليها ثواب كتير …بس جدد نيتك دائما