ياللي مش عجباك حياتك

ياللي مش عجباك حياتك
ياللي بتقول ليه وليه

بص شوف كده ناس كتيرة
ضايعة مش لاقية الجنية
ناس بتشحت ناس فقيرة
احمد ربك ع اللي انت فيه
ناس في خط الفقر عايشة
ناس بتسكن جوة عشة
ناس بتحلم تلقى قشة
طوق نجاة تتحاما فيه

ياللي مش عجباك حياتك
بص شوف حال البيوت
بيت حيطانه مشققة
بيت بطين حاضن السكوت
ناس بتسكن في الخرابة
وفي الزبالة تلم قوت
ناس بتحلم تلقى أوضة
ناس حياتهم عايشة موت
ناس وناس تايهين في سكة
ناس بتمشي وناس تفوت

ياللي مش عجباك حياتك
بص شوف حال الرصيف
ناس بتسكن في الشوارع
حتى مش لاقية الرغيف
ناس عيشتها بجد صعبة
ناس حياتها شجر خريف
هي دنيا الموت آخرها
اي واحد فيها ضيف

ياللي مش عجباك حياتك
ياللي بتقول ليه وليه