كان حدانا في القرية.

كان يا ما كان فى كل قريه مصريه

كان حدانا في القرية والقُري اللي جنبها
أي زوجه تقول لأخو زوجها يا عمي حتى لو أصغر منها ب 20 سنه , و أخت الزوج اسمها عمّه , ده لا قهر ولا استعباد , دي موده ومحبه .واحترام

كان حدانا في القرية.
أي راجل بشنب ملو هدومه يقول لأي ست أكبر منه يا خاله حتى لو ماتقربلهوش خاله فلانه , لو كان عندها ألف فدان يقول لها يا خاله , ولو بتبيع جرجير قدام الجامع يقول لها يا خاله .

كان حدانا في القرية
العم بيتقال له أبوك فلان , روح هات كذا من بيت أبوك فلان , اللي هو عمك , و الجد بيتقال له سيدي فلان و أي راجل عجوز بيتقال له يا سيدي

كان حدانا في القرية
الإبن حتى لو كان أستاذ في الجامعه يبوس إيد أبوه و أمه و عمه الكبير و خالته الكبيره , يوطي و يبوس ضهر إيدهم مش يبوس خدهم .

كان حدانا في القرية …
لو حد تعب البلد تتقلب , ولو حد مات كله يعزي و يجهز أكل للضيوف اللي جايين يعزو من بره البلد ( كل بيت يجهز أكل ) , و في الفرح كله يحضر من غير كارت دعوه , من غير قاعه , القرية بتبقى هي القاعه .

كان حدانا في القرية…
ناس بتصحى من الفجر تركّب العده عالحمار و تعلّقه في العربيه الكار و تربط البهايم في العربيه من ورا و صوت ماكينات الري يظهر مع صياح الديوك , و أرض عطشانه بتشرب و عصافير بتسبح ربنا .وراديو بيقرأ القرآن في كل بيت

كان حدانا في القرية…
لو ماشي وشايل حاجه بتتاكل جايبها من الارض لازم تعزم عالناس اللي بتقابلك , خد لك شوية بصل أخضر لسه بطينهم أهم , خدي لك كرنبه يا خاله . خوديلك قرنين فول اخضر يا خاله

كان حدانا في القرية…
ناس بتنام بعد العشا , إيديهم خشنه و مشققه , بينامو مهدودين و مبتسمين , مطمنين، مرتاحين البال لا سمعو عن أمراض نفسيه ولا يعرفو المنوم و لا المهدئات ولا لعنو الظروف ولا الدكتور قال لهم محتاجين تطلعو شرم أسبوع عشان تغيرو جو .

كان حدانا في القرية…
لمه وقت العصريه قدام كل بيت، ضحكه بتطلع من القلب وحب الخير للجار و كلام حلو , صباحك نادي , خلّي عنك , العوافي , من يد ما نعدمهاش، ازيكم

كان حدانا في القرية.
طرنبة مايه عمرها أكبر من عمر بلاد عالخليج و شجرة عمرها أكبر من عمر أمريكا . وابتسامه صافيه من القلب متقدرش تشتريها دولارات العالم

كان حدانا في القرية..
وشوش بتعرف تبتسم و عواجيز في ملامحهم خريطة بلد , و عيال صغيره بتاخد الحكمه والفلسفه من القاعده مع الاجداد ( لما بيقعد مع سيده ) , مش من كتب ( الخواجات ) .

كان حدانا في القرية.
واحنا صغار بنلعب، اللعب يقف لما الراجل او الست الكبيره تعدي، وكان لما ابو اي حد فينا يجي نحط عنينا في الارض احتراما ليه،، ونقوله يابا

كان حدانا في القريه.
أدب و خجل و توقير للكبير و فيها حياه , حاجات كتير اختلفت بس لسه فيها حياه , الله يخرب بيت المدنية علي التطور على أم عوجة اللسان على بليز على ميرسي علي الماكياج و الماسكات و الوشوش.
يرحم زمااان وليالي زمان ايام العزه والكرامه والشهامه والضحكه اللي م القلب..