Health NEWS اخبار الصحه في مصر علي مدار الساعه
كان فيه راجل بيبيع جرايد جنب الجامعة الامريكيه فى التحرير..كنت باشترى منه اللوموند عشان اتعلم فرنساوي لكن علمني حاجة اهم من الفرنسية
هذا الراجل علمنى درس مهم جدا للعمر.
لما كنت اسأله ازيك انهاردة يقولي “في نعمة الستر”..!
فاندهشت من الإجابة وسألته ليه الستر تحديدا؟
قالي لأني مستور من كله.. ستر ايه يا حج ده انت البلوڤر بتاعك فيه رقعتين مختلفين اللون فلما احس بغبائي فبادر بالشرح.
قال الستر ده انواع:-
- لما تكون مريض بس قادر تمشي علي رجلك ده ستر من مذلة المرض.!
- لما جيبك يكون فيه 5 جنيه تكفيك تنام متعشي حتي لو عيش حاف ده ستر من مذلة الجوع .!
- لما تكون تملك ملابس تحميك من البرد حتى لو مرقعة ده ستر من مذلة البرد.!
- لما تكون قادر تضحك وانت حزين لأي سبب ده ستر من مذلة الكسرة.!
- لما تكون قادر تقرا الجريدة اللي في ايدك ده ستر من مذلة الجهل.!
- لما تقدر تتصل فى اى وقت بأهلك تطمنهم عليك وتطمن عليهم ده ستر من مذلة الوحدة.!
- لما تكون عندك اي وظيفة حتي لو بياع جرايد زى حالاتى بس مش بتمد ايدك لحد ده ستر من مذلة السؤال.!
- لما يكون ابنك ربنا مبارك في صحته وتعليمه وبيته ده ستر من مذلة القهر.!
- لما يكون عندك زوجة بنت حلال وشايلة الهم معاك ده ستر من مذلة كسرة الراجل قدام مراته.!
- الستر يا ابنى مش ستر فلوس الستر ستر نفوس.!
تذكر انك تملك نعم يتمناها ملايين البشر انها نعمة الستر.
جعلنا الله واياكم من المستورين بستره الجميل
اللهم ادم علينا سترك دنيا وآخرة
