اضرار الاسراف في المسكنات

د. ايمن خضاري ابوجبل

كمية العيانين اللي بييجوا كل يوم يكشفوا عادي وفجأة يتصدموا ان عندهم “فشل كلوي” …. بقت مهولة!!

كل يوم ف حدود 10 او 15 حالة بيتفاجئوا انهم مرضي فشل كلوي و محتاجين غسيل كلي!!

شباب و بنات و ستات صغيرة ف السن مابيعانوش من أي حاجة و زي الفل و فجأة يتعبوا..ييجي يكشفوا يتفاجئوا ان عندهم فشل كلوي
و السبب اللعين ورا الحالة دي….”المسكنات”

في نوع من المسكنات اسمه “NSAIDs” كتره و استخدامه عمال علي بطال بيسبب فشل كلوي
و للأسف النوع دا هو اللي منتشر اصلا بين الناس و بيتسف زي البونبوني..

النوع دا موجود في
“البروفين – كاتافلام – كيتولاك – ڤولتارين-…”

لما واحد يجيله حبة صداع يقعد يسف بروفين..
لما واحد سنانه توجعه شوية يروح يسف كاتافلام..
لما واحدة يجيلها دور برد و تنزل الصيدلية يديها حقنة الڤولتارين السحرية…و كل ماتتعب شوية تنزل تاخد نفس الحقنة

كلها حالات مشهورة و بتتكرر …و ادوية الجيران بيوصفوها لبعض
من غير رجوع لدكتور او حد يشوف الحالة محتاجة و ينفعها الدوا دا اصلا ولا لأ
و للأسف بيرتاحوا فعلا بس اخرتها “كارثة”

---

عشان خاطر صحتكم وحياتكم
بلاش مسكنات ع الفاضي و المليان