المعادله الصعبه

بقلم د. ايمن خضاري ابوجبل

تاني وتالت ورابع، الشغل مش حياه !!
منذ بدء الخليقة وأهميه الشغل تكمن في أنه يوفر ليك حياه أدميه.
إنما الشغل في حد ذاته مش حياه!!!
الشغل ماهو إلا وسيله بتقدر من خلالها تجيب فلوس تخليك تعرف” تعيش حياتك مبسوط”
دا دور الشغل من أول الإنسان البدائي اللي كان بيطلع يصطاد (يشتغل)عشان ياكل ويقدر يكمل باقي يومه في اي حاجه تانيه غير الصيد(الشغل).

ف نصيحه
-بلاش تسخر حياتك للشغل !!
-بلاش تقعد اكتر من المواعيد الرسميه في شغلك علي حساب عيلتك !!
-بلاش تأجل زيارات ومناسبات عائليه بسبب الشغل !!
-بلاش تيجي علي حساب صحتك بسبب الشغل !!

كل يومين نسمع عن حد من سننا أو أصغر اتوفي بسبب ضغط الشغل او الضغط النفسي بسبب الشغل اللي ادي لحجات كتيره !
ف نصيحه يعني ! محدش بيفتكر حد بعد ما بيموت ويقول الله يرحمه كان بيحقق التارجت !! المكان اللي أنت بتموت نفسك عشانه أنت بالنسبه له كرسي عليه موظف ولما يحصلك حاجه هيبدلك بموظف غيرك بمنتهل سهوله !!

الخلاصه يعني:

• حاول دايماً تحافظ علي التوازن بين حياتك وعملك
  وخليك دايماً فاكر أن اللي بيقعد اوفرتايم في شغله مش شاطر هو بس مش عارف يدير وقته
• دور علي اللي بيخليك مبسوط وأبدء فيه حالا ! العب رياضه ، أقرأ، أرسم، ساهم في نشاط خيري، اعمل أعمال تطوعية، خصص وقت اكبر لأسرتك، عيد اكتشاف نفسك واهتماماتك مره تانيه.

بغض النظر عن اللي هتقرر تعمله بس صدقني وقتها بس هتتأكد أن الشغل مش حياه وانك كنت هتضيع حياتك في ال لاشئ!!!
وبالمناسبة ” لما تموت وانت مأجل شغل احسن ما تموت وانت مأجل حياة..”
منقول للفائده
الاختلاف البسيط مع المقاله اذاي نجمع بين الاثنين اذاي نحول العمل الي حياه سعيده دي اصعب معادله