صانعوا السعاده

الصوره دي انا اللي مصورها من عربيتي.. كنت راكن في مكان في التجمع جمب محطة بنزين و قاعد بتكلم في التليفون و لقيت قدامي واحده شايله شنطه كبيره في حاجات بتتكلم في التليفون و بعدين قفلت فمركزتش اوي معاها مفيش 5 دقايق لقيت احدعمال تموين المحطه معدي من جمبي و جه آخد منها الشنطه و حطها علي طوبه و بداء في تجميع الطوب و عمل طرابيزه و مقعدين و قعدوا فتحوا الشنطه و طلعوا آكل جيباهوله علشان ياكل و ابتدوا ياكلوا.. انا قفلت التليفون اللي معايا و بقيت قاعد اتفرج و في منتهي الاعجاب و الاحترام لهؤلاء الغلابه و مدي سعادتهم و فرحتهم و هما بياكلوا و يشربوا و بيضحكوا ولا اكنهم في اوتيل 7 نجوم.. و بعدها بخمس دقايق لقيت رئيس الورديه بتاعه جي بيسلم علي مرات الراجل دي و جايبلهم شنطه بلاستيك في ازازتين ميه و كانز بيبسي و مشي و سابهم في خلوتهم الرومانسيه. انا بقيت قاعد بجد مش مصدق اللي انا شايفه ده و اد ايه الحب و السعاده و الفرحه مش في عربيه و فلوس و شغل و اماكن فارهه و من شدة اعجابي مقدرتش امنع نفسي من سؤال الراجل و هو معدي من جمبي كان قايم يجيب حاجه و راجع فسألته في منتهي الخجل و الاعتذار علي تطفلي علي خلوتهم هي دي المدام؟؟ رد و هو في منتهي السعاده و الفرحه علي وشه و قاللي اه يافندم احنا مضايقين حضرتك؟؟ قولتله بالعكس انا بجد عاوز اقولك ربنا يسعدكم و يفرح قلبكم و يملي حياتكم بالخير و السعاده دايماً يا رب. الراجل فرح اوي بالكلام ده و قعد يشكرني و يدعيلي و حاولت اديله مبلغ بسيط كده رفض تماماً….الحب و الفرحه و السعاده بجد ملهمش مكان و لا تمن و لا زمن دي حاجه بداخلنا تعبيراً عن مشاعرنا و احاسيسنا.. احترامي لهذا الثنائى السعيد.??
اسعد الله مسائكم