شخصيات عامة

كان في موقف حكاه حسن كامي الله يرحمه في التلفزيون زمان ، فبيقول ان لما عملوا مسلسل (ناس وناس) اللي كان فكرة احمد رجب ومصطفى حسين ، كان هو عامل شخصية (عزيز بك الأليت) وكان دائما يطلع بيتكلم عن السيجار والكافيار و”السومون فوميه” ، في برنامج كانوا عاملينه ومستضيفين فيه ابطال المسلسل ، فأحمد راتب على سبيل الدعابة بيقول لهم : مرة عُمال من اللي شغالين في اللوكيشن سألوا حسن كامي : يعني أيه “سومون فوميه”؟! ، فقال لهم : هقولكم بكره ، وجه الفنان الجميل تاني يوم ومعاه 180 ساندوتش “سومون فوميه” وكل الناس في اللوكيشن من أول أبطال العمل لعامل البوفيه ، أكل “سومون فوميه” ، فالمذيعة ضحكت وقالت له : كل الساندوتشات دي طيب ما كنت اشرح لهم وخلاص فرد عليها رد جميل جدا قالها : ” ده أكل ما يتشرحش ، لازم يدوقوه عشان يعرفوا هو إيه” ، الحكاية دي لما عرفتها ، شوفت أد إيه الفنان حسن كامي رجل طيب ، جاب سندوتشات للعمال ولما كبرت أكتر فهمت اد ايه هو كان انسان راقي مش فكرة أنه طيب أو بيصعب عليه الناس ، الرقي هو شعور الإنسان بانسان زيه حتى لو كان بساندوتش “سومون فوميه” … الله يرحم حسن الكامي الفنان الجميل .. ابن الاصول ❤
….

عثمان احمد عثمان الاسطوره الذى صنع نفسه بنفسه

• دخل كلية الهندسة بشهادة فقر لأن مش معاه فلوس يدفع المصاريف ( 40 جنيه )
• كان بياخد المسافة من الجيزة للكلية مشي كل يوم لأن مش معاه يركب مواصلات
• بالعافية اخته وفرتله 120 قرش عشان يدفع اشتراك الترماي 3 شهور بدل ما يمشي .. قام بدل ما يدفع 3 شهور راح اشتري عجلة مستعملة ب 60 قرش كفته ال 5 سنين بتوع الكلية وفي التخرج اداها هدية للفراش بتاع الكلية
• النهاردة عثمان احمد عثمان صاحب أكبر شركة مقاولات في العالم العربي وافريقيا وخامس أكبر شركة في العالم وشركته مصنفة في عدة تصنيفات دولية
• عثمان احمد عثمان مسك وزير مرتين في عهد السادات .. مرة وزير التعمير ومرة وزير الاسكان
• عثمان احمد عثمان بني اكتر من 150 شركة خلال فتراته في الوزارة
• عثمان احمد عثمان مسك نقيب المهندسين ولما مسك النقابة حولها من مؤسسة تعتمد على دعم الدولة الي مؤسسة ربحية وأنشأت عدة مشاريع كبيرة
• المقاولين العرب شاركت في العطاء بتاع السد العالي في الوقت اللي اجتمعت فيه كل شركات المقاولات الاخري في طرف تاني ضد عثمان احمد عثمان ويوم فتح المظاريف كانت قيمة عطاء الشركات 27 مليون جنيه وقيمة عطاء عثمان احمد عثمان 15 مليون بس !!
  وبالفعل هو اللي انشأ السد العالي
• المقاولين العرب مات منها 500 عامل في حروب الاستنزاف وهم بينشئوا قواعد للصواريخ المصرية لأنهم كانوا شغالين والقنابل بتنزل فوقيهم وكملوا بناء بعض القواعد اللي اتهدمت 5 مرات من القنابل
• المقاولين العرب النهاردة ليها فروع في أكتر من 24 دولة في العالم
  قصه نجاح عظيمة محتاجة الجيل الجديد يعرف مين الأسطٌورة نمبر وان الحقيقي ! رحمه الله عليه