د/ أحمد صالحين البحيري
اخصائي جراحة العظام والكسور

? ناس كتير جدا بتخاف من الحقن الموضعي في المفاصل والأنسجه فيما يخص تخصص العظام وأمراض المفاصل ،
وبيكون ردهم لما تعرض عليهم الموضوع ده كطبيب ، انك دكتور عاوز تئذيهم او بتضحك عليهم ،
? وده بالنسبه للمريض بيكون مبني ع خزعبلات وآراء من العوام اللي حواليه ، وان لو حد فيهم أخدها وحصلتله أي مشكله بعدها انشالله بسنين ولو حتى متخصش العظام خالص ، فالحقنه اللي أخدها غالبا بتكون هي المتهم الأول ، وطبعا ده كله بسبب الطبيب المؤذي اللي معندوش رحمه ??

? حابب اوصل للناس ان الحقن الموضعي ده تقليد علاجي موصوف في الكتب الطبيه ومعروف في كل مكان وله نتايج كويسه جدا ع حسب الحاله ،

? وعشان نفهم اكتر
هوضحلك ايه انواع الحقن الموضعي وايه الحالات اللي تستلزم الحقن الموضعي بس الاول هتكلم عن اشهر نوع حقن بتنضرب موضعيا واكتر نوع انتشرت خرافات الدنيا عنه ،

?? حقن الكورتيزون – أيوه كورتيزون ومتبحلقليش –
حقن الكورتيزون طويل المفعول له فوايد وأثار كبيره جدا في كثير من حالات المفاصل وتليف الأنسجة والتهاب الاوتار ، وملوش الاثار الجانبيه الفشيخه اللي بتسمعها من الاهل والمجتمع والناس ،
حقنة الكورتيزون الموضعيه مش هتنفخك ولا هتموتك ولا هتجيبلك السكر ولا الضغط ولا هتعملك هشاشه عظام ، حقن الكورتيزون علاج عادي مصرح بيه من وزارة الصحه وبيتاخد في حالات كتير تحت الاشراف الطبي ومبيكونش منه ضرر زي مانت متخيل

النوع التاني من الحقن

?? حقن البلازما
وده يعتبر علاج حديث نوعا ما وبيتم فيه استخلاص البلازما الغنيه بالصفائح الدمويه من دم المريض نفسه ، عن طريق المعمل اللي بيسحب العينه ويعملها طرد مركزي ويجهزها ويتم بعدين حينها بواسطه الطبيب ، وأهم حاجه في الموضوع ده هي طريقة الفصل انها تتم بشكل جيد ومغلق في المعمل حتى لا تكون وسيله لانتقال العدوى للمريض

?? الحقن الزيتية او حمض الهيالورونيك hyaluronic acid
والحقن دي بتكون جاهزه وموجوده في شركات الادويه وبتستخدم لحقن الركبتين في حالات الخشونه البسيطه ، فيه منها اللي بيتاخد وان شوت ، يعني مره واحده وفيه اللي بيتاخد ع تلات اسابيع كل اسبوع حقنه وممكن ناخد معاها كورتيزون

ايه بقا الاماكن اللي ممكن نحقنها ؟؟!!! ??

1 – حقن الرسغ ،
زي مثلا متلازمه النفق الرسغي في معصم اليد carpal tunnel syndrome ، ودي غالبا بنحقنها كورتيزون وبيعتبر وسيله علاجيه في حالات الاختناق الخفيفه وكمان يعتبر تشخيصه في الحالات الشديده ، يعني بنتأكد من خلالها ان التشخيص سليم اذا حصل تحسن مؤقت ، وزي كمان التهاب غشاء اوتار الابهام Dequrvan اللي ممكن نحقنها كورتيزون وممكن نحقنها بلازما

2 – حقن الكتف ،
زي حالات التهاب واختناق اوتار الكتف impingement shoulder ،
وزي حالات الكتف المتجمده – frozen shoulder – ودي ممكن نستخدم فيها كورتيزون وممكن بلازما ،

3 – حقن الأصابع ،
زي حالات الاصبع الزنادي trigger finger ، والامور بتتحسن مع العيان لما بتكون درجة الحاله بسيطه ،

4 – حقن المرفق ،
وده زي حالات مرفق التنس ومرفق الجولف
Tennis elbow, golf elbow
وده بيكون عباره عن التهاب في الاوتار المندغمه في عظام المرفق ، وده برضو ممكن نحقن فيه كورتيزون وممكن برضو بلازما والبلازما ليها نتايج كويسه في الحالات دي ،

5 – حقن المفصل العجزي
sacro- iliac joint
وده بيكون عباره عن التهاب في المنطقه دي وممكن يكون ناتج عن مشاكل وأمراض تانيه وبرضو يعتبر الحقن الموضعي في المنطقه دي علاجي وكمان تشخيصي ،

6 – حقن الركبه
الركبه ممكن يتحقن فيها كورتيزون ، وده في الحالات الكبيره في السن واللي المفصل فيها متاكل والحقن بيكون عشان نعمل تحسن مؤقت فقط لا يتجاوز شهور والافضل طبعا في الحالات دي تغير المفصل ،
وكمان ممكن نحقن فيها hyaluronic acid ودي ماده زي السائل الزلالي وليها تركيزات وانواع مختلفه – الحقن الزيتية- ودي ليها تأثير كويس في حالات الخشونه البسيطه وممكن نحقن معاها كورتيزون كمان وبيجيب نتايج افضل واسرع
طيب كمان ممكن نحقن فيها بلازما غنيه بالصفايح الدمويه ودي بيكون ليها نتايج كويسه برضو في حالات الخشونه البسيطه ولكن تأثيرها بيتأخر شويه مش بيكون فوري ،

7 – حقن الكاحل والقدم ،
وده في حالات خشونه الكاحل واختناق الاعصاب Tarsal tunnel syndrome ، وكمان التهاب الاوتار بتاعه القدم tendosynovitis ، ودي ممكن نحقنلها كورتيزون وممكن نحقنلها بلازما كمان ،

8 – الشوكه العظميه – التهاب اللفافه الاخمصيه ،
ودي ممكن نحقنلها كورتيزون وبيجيب نتايج فوريه وكمان ممكن نحقن بلازما بس نتايجه بتتأخر شويه ومع ذلك مدى فاعليتها بيكون اطول

بكده اكون لخصت لكتير من الناس موضوع الحقن الموضعي ، سواء بغرض التثقيف او التعليم للأطباء الاصغر سنا

?? طيب هل الحقن الموضعي ضمانه للشفاء التام ؟!!
? الاجابه لأ ، في حالات كتير مش بتستجيب للحقن وخاصه الحالات المتأخره

?? طيب هل الحقن الموضعي استمرارية فاعليته مضمونه ؟!!
? برضو لأ ، يعني ممكن يستمر وممكن ياخد وقت محدد فقط وده بيعتمد ع نشاط العيان نفسه واتباعه للتعليمات بتاعه الدكتور وكمان درجة الحاله نفسها لان الحاله المرضيه كل ماتكون في بدايتها كل مايكون مفعول الحقن افضل واطول في المدى العلاجي بتاعه ،

يارب أكون قدرت اشرح الموضوع بشكل بسيط ومفهوم ، واكون طمنت كتير من الناس وعرفتهم ان الحقن الموضعي مش بعبع ولا حاجه وانه تقليد وإجراء طبي معروف ،

شير وفيد غيرك