*قوم يا ولدي..

*قوم يا غالي..

*قوم عشان الفجر ادن..

*قوم يا واد علي أكل عيشك..

يوه يا أمي

لسه بدري

*بدري اية دي الشمس طِلعت

شمس طِلعت!

كيف يا غالية والقمر واقف قصادي

احنا يا أمه صبحنا نادي

*قوم يا واد بطل كلام

*الفطار جاهز حداك

*صلي وأفطر

*وانت نازل ابقي سك الباب وراك

*وأوعى تنسى تغطي وِلَدك

*ربنا يبارك فى عمره

*وتخاويه ويكونوا سندك

وانت راجع..

*ابقي عدي ع البنات

*زعلانين منك خواتك

*م انت ليك مدة هاملهم

*عشمانين يا ولدي فيك

*هو مين غيرك باقي لهم

*اوعى يعني تقول ظروف

*همه عايزين بس تسأل.

*همه عارفينك يا ولدي

*لو معاك عمرك ما تبخل.

*واوعوا تزعل من أبوك

*هو برضه غصب عنه

*الطريق محتاج لاخوك

*خد بايده يا حتة منه..

*خلي بالك من عيالك

• لاجل خاطري..روح ل خالك

*بزياداك مقاطعه ليه

*ربنا وحده اللى يعلم

*ايه اللى صابه..وايه اللى بيه

*أعمل المعروف يا ولدي

*وقت عوزه هتلاقيه

*وان عليا ..م انت عارف

*عمري مره ما قولت حقي

*يعني انا اللى مسامحه فيه..

*والله موته فيا آثر

*اللى عمره ف يوم ما اثر

*خلي بالك من وِلاده

*واوعى يوم الخير تفسر

*كون معاهم

*زيّهُ..وأكتر

*قد ايه فرحانه بيك

*وأنت يوم عن يوم بتكبر

*قلبي داعي يا ولدي ليك

*ينصرك دايما ما تخسر.

*يرزقك ذريه صالحة

*يسندوك وقت أما تكبر

ياااااااااه

ياه يا أُمي

لسه يا امه شاغله بالك

لسه شايله الهم برضه

رغم انك مش معايا

حاسه دايما باللى بيا

كيف عرفتي

مي اللى قالك

حالي يعني أزاي واصلك

اه يا شمس حياتي لمه

سبتي قلبي فى ليل طويل

اه يا جرح القلب يا امه

من فراقك صار عليل

صعب بعدك قلبي يلقى

غيرك انتي مفيش بديل..

غيرك انتي مفيش وطن

اه مفيش بعدك حماية

حضن قلبك كان سكن

بسمتك كانت كفاية

تسعد العالم بحاله

انتي عزوه ونور ولمه

أنتي يا امه..

انتي يا امه بحر هادي

صبح نادي

انتي عنواني وبلادي

ضحكتك بلسم فؤادي

انتي عيدي

نبض بيدق ف وريدي

نخلة شامخة ف قلب روحي

تحمي أوراقي وجريدي

أنتي يا امه الجنة ذاتها

يوم رضاكي تكون نصيبي..

شاعر_الغلابة

(وَمَنْ أَحْيَاهَا فَكَأَنَّمَا أَحْيَا النَّاسَ جَمِيعًا)
الاخوه الافاضل يعتبر سرير العنايه المركزه من اصعب الطلبات التي اقابلها يوميا وذلك لقلة عدد الاسره او لارتفاع سعر السرير نتيجه لارتفاع سعر الخدمه لذلك اطرح عرض بعمل مركز متخصص للعنايه المركزه خيري او بسعر رمزي ويتولي المجتمع القنائي التمويل عن طريق التبرعات بمبالغ بسيطه تضمن ان شاء الله توافر سرير حال الاحتياج اليه لاقدر الله علي ان تقوم جمعية اصدقاء المرضي بقنا بأخذ المبادره خصوصا في وجود شخصيه محبة للخير ووطني حتي النخاع السيد الاستاذ حسين الباز وكيل وزاره التضامن الاجتماعي بقنا لذلك ادعوا الجميع للتواصل معنا في حاله الرغبه في المساعده والترويج للفكره قبل التبرع فقنا مليئه بالقامات والشخصيات الوطنيه
حفظ الله الجميع
في انتظار تواصلكم بالافكار والمقترحات