بقلم دكتور / ايمن الامين

المغربلين ، السروجية ، الدرب الأحمر ، حوش الغجر ، بركة الفيل ، تل العقارب ، درب المهابيل ، السكاكيني ، العباسية و غيرها من شوارع و احياء مصر القديمة ، و وراء كل اسم من هذه الاسماء حكاية و سر .. لنصحبكم في جولة في شوارع و احياء قديمة بالمحروسة لنتعرف على الاسرار الكامنة وراء هذه الاسماء
المغربلين ، السروجية ، الخيامية، القربية ،الساقين ” والتى تقع بالقرب من بعضها البعض المغربلين، كان يسكنها العطارون اللذين كانوا دائما يغربلون عطارتهم حتى تخلو من الشوائب لذلك سميت بالمغربلين، أما السروجية فكانت مشهورة بصناعة كل ما يخص الخيول من الحدوات وسروج ولذلك سميت بالسروجية ، اما الخيامية فكان يقطنها صناع الخيام، و كذلك القربية أيضا سميت بذلك الاسم لأن سكانها كانوا مشهورين بصناعة القرب وبيعها إلى الساقيين .

▪الدرب الأحمر : اسم المنطقة يرجع لحادثة مذبحة القلعة الشهيرة بعد قتل محمد علي لكل المماليك فى ذلك الوقت، ويقال أن المنطقة امتلأت بالدم واستغرقت فترة طويلة للتخلص من أثاره، ولذلك أطلق عليها الدرب الأحمر .

▪بركة الفيل تعود بقصته إلى عهد الفراعنة، حيث كان يعيش عدد من الفيلة فيها وكان يعبدهم أهالى المناطق المحيطة، وعندما كانت تجف الأرض يصلون لها ويطلبون نزول الماء، لذلك أطلق على هذه المنطقة برَكَة الفيل بفتح الباء و مع مرور الزمن اطلق عليها العامة “بركة الفيل” بكسر الباء .

▪تل العقارب بالسيدة زينب تعود سر تسميته بهذا الاسم إلى أن هذه المنطقة كانت منطقة جبلية تحوى آلاف العقارب والثعابين، لذلك سميت بتل العقارب .

▪حوش الغجر : تقع هذه المنطقة خلف سور مجرى العيون فى مكان شبه مغمور ، و لهذا السبب كانت تأتى بعض القبائل الغجرية التى كانت تطرد من الصعيد، هاربين إلى القاهرة محاولين الاختفاء فترة .

▪درب المهابيل : سميت هذه المنطقة بهذا الاسم نتيجة وجود بعض محال البوظة التى كان يقبل عليها أهالى المنطقة، مما كان يجعلهم سكارى معظم الوقت ولذلك سميت بدرب المهابيل .

▪ درب البرابرة : سميت بهذا الاسم نتيجة نوعية سكانها من البرابرة سواء من المغرب العربى أو السودان أو أفريقيا، وكانوا يتسمون بالفقر الشديد و كانوا يعملون بالخدمة عند أهالى حى “درب الأغوات” و الذى كان يسكنه الأغوات ومعظم رجال البلاط الملكى.

▪ العباسية : أن العباسية كانت تسمى “أرض الطبالة”، وكانت من أغنى وأجمل مناطق القاهرة، وفي سنة 1849 م أنشأ عباس حلمي الأول ثكنات للجيش، ومنذ ذلك الحين سميت “العباسية”، ثم عمرت وبنيت المباني بها، وقسمت إلى أحياء .

▪الفسطاط : ذكر كتاب “أصل الأشياء” قصة أخرى لها: “بعد فتح عمرو بن العاص مصر، راودته قصة طريفة ترجع سببها لتسمية الفسطاط، عندما قرر المسلمون الرحيل وجدوا عش يمامة على فسطاط “خيمة” عمروبن العاص، فأمر الجنود أن يتركوها، ومنذ ذلك الوقت سميت بـ”الفسطاط”، وبني بها أول مسجد في إفريقيا باسم عمرو بن العاص.

▪خان الخليلي :سمي بهذا الاسم نسبة لمؤسسه الأمير “جركس الخليلي”، و هو احد امراء السلطان برقوق ، ويضم خان الخليلي مساجد ومعالم أثرية وأسواق ، ويقع فوق مقابر الخلفاء الفاطميين سابقا .

▪حلوان : ذكر في كتاب “أصل الأشياء”، أن حلوان أنشاها عبدالعزيز بن مروان سنة 67هـ، 686 م، وأنه اضطر للانتقال إلى الفسطاط في سنة ظهور الطاعون. اختار لها ابن مروان اسم حلوان، لأنه يرى أن موقعها يشبه حال مدينة “حلوان” في العراق.

▪العجوزة : أحد أحياء الجيزة , تعود تسميتها إلى “نازلي هانم بنت سليمان باشا الفرنساوي”، مؤسس الجيش المصري بعهد محمد علي. لقبت بـ”العجوزة”، لأنها أشرفت على بناء مسجد العجوزة رغم بلوغها 90 عاما، ما جعل الأهالي يطلقون على المسجد والمنطقة بأكملها “العجوزة”.

الأزبكية : نسبه للامير أزبك أتابك الجيش المصرى فى عهد السلطان الأشرف قايتباى. حى الأزبكيه

الظاهر : نسبه للسلطان الظاهر بيبرس. حى الحسينية و الظاهر

باب اللوق : عُرفت قديمًا بخط الاسماعيلية نسبة للخديوى اسماعيل. فى بدايات العصر المملوكى كانت ارض زراعية سُميت ” لوق ” لانها كانت بترمى ” لوق ” لما بتبدأ زراعتها بعد الفيضان اللى كان بيغمرها. فضلت ارض زراعيه لغاية سنة 1261 لما بنى فيها الظاهر بيبرس بيوت للمغول الوافدين ، و بعدين اتحولت لأرض زراعيه تانى لغاية سنة 1858 لما بنى فيها الخديوى اسماعيل مبانى و بيوت و قصور و ظهرت فيها الشوارع و الميادين

بولاق الدكرور : كلمة دكرور متحرفه من كلمة ” تكرور ” و هما قبايل افريقيه سود جم مصر من غرب افريقيا. اتعرفت زمان باسم يمنية بولاق ، و بعد ما عاش فيها شيخ ولى اسمه ابو محمد يوسف بن عبد الله التكرورى فى العصر الفاطمى اتعرفت ببولاق التكرور. سنة 1863 اتحول مجرى النيل ، و هدت الدوله المسكن فى بولاق التكرور سنة 1868 ، و عزلت الناس للمكان الحالى اللى فيه المتحف الزراعى و بيتقال ضريح الشيخ يوسف التكرورى.

اثر النبى : بيتسمى بالاسم ده عشان موجود فيه حجر قديم عليه شكل قدم بيعتقد الناس انها اثر لقدم النبى محمد. اتنقل الحجر ده للحامع اللى بناه الظاهر بيبرس و بنى فوقيه قبه لسه موجوده. فى الحى ده فيه كمان دير مسيحى مشهور اسمه دير الملاك.

الاسماعيليه : اتنسب للخديوى اسماعيل . من أحياء القاهره القديمه ن بيمتد من غرب حى الأزبكيه و شارع عابدين للنيل و قناة الاسماعيليه اللى كانت بتبدأ شمال موقع متحف الاثار المصريه لكن اتردمت. الخديوى اسماعيل شيد الحى ده على النمط الأوروبى و منح اراضيه بالمجان للى يتعهد انه يبنى بيت قيمته مش اقل من 1200 جنيه فى مدة 18 شهر.الحى اتميز بأوتيلاته و كنايسه و بيوت و سرايات الأعيان و القنصليات. كان فيه معسكرات قصر النيل اللى اتدمت فى أربعينات القرن العشرين و اتبنت مكانها جناين التحرير و فندق النيل هيلتون و مقر الاتحاد الاشتراكى و جامعة الدول.

إمبابه : على الشط الغربى للنيل اتجاه بولاق على بعد 10 كيلو من الجيزه، بيوصل ليها شارع 26 يوليه و كوبرى الزمالك. اتعرفت باسم انبابه قبل الاسم ما يتحرف لإمبابه. حصلت فيها معركه بين جيش نابوليون بونابارت و بقايا المماليك فى العصر العثمانلى (1798).
الخرنفش : اسمه متحرف من كلمة ” الخرنشف “. ايام الفاطميين كان ميدان جنب القصر الغربى و البستان الكافورى.
الخليفه : بيتعرف كمان باسم حى القلعه لإن قلعة الجبل بتطل عليه. موقعه فى جنوب القاهره و شارع القلعه بيوصله للعتبه الخضرا فى قلب القاهره.
السيده زينب : السيده زينب حفيدة النبى محمد و بنت الإمام على ، راحت مصر و سكنت المنطقه دى فى ضيافة والى مصر فى قصره اللى اتحول بعد وفاتها للضريح الحالى فى ميدان السيده زينب و اتنسب الحى لإسمها.
عابدين : بيتنسب للامير اللواء السلطانى عابدين بك اللى كان ساكن ناحية سويقة صفيه جنب الزير المعلق. جدد جامع الفتح اللى فى الحى وكان جنب بيته فأتنسب اسم الحى ليه. لما بنى الخديوى اسماعيل سراية عابدين دخل الجامع فى حدود السرايه.
شبرا : فى القرن 13 كان مكان بتغمره ماية النيل ، لما ظهر فى التقسيم الإدارى لأحياء القاهره كان بيتكون من جزيرة بدران و كوبرى شبرا، عد سكانه فى الوقت ده كان 1091.
زينهم : اتبنى على أطلال مدن العسكر و القطائع جنوب حى السيده زينب.
العباسيه : بيتنسب لوالى مصر عباس حلمى الاول اللى عمره و بنى فيه فى سنة 1849 معسكرات للجيش ، و بعدين تبعوهم التجار و الأهالى و بنوا فيه بيوت و دكاكين جنب المعسكرات. الأراضى كانت بتديها الدوله بالمجان للى عايز يبنى عليها و بكده اتوسعت المنطقه. ايام الخديوى اسماعيل كانت مبانى الحى ده ما بتتجاوزش المنطقه اللى بين الزعفران و القبه الفداويه.
الصاغه : ده حى الصيغه الدهب فى القاهره ، بيتفرع من شارع الموسكى قبل الازهر و بينتهى عند خان الخليلى و النحاسين. فيه محلات كتيره بتبيع الصيغه و الأحجار الكريمه ، و بيتميز بحواريه الضيقه و بيتسمى شارع الدهب.
الصليبه : اتعرف بالاسم ده لإن بتتلاقى فيه شوارع الصليبه و شيخون و الركبيه و السيوفيه ، مكونه شكل صليب اتجاه سبيل ام عباس. بيتميز الحى ده بأثار مصريه جميله من العصور الوسطى.
طره: اسمه الأصلى ” طارو ” اسم فرعونى. بيتعرف دلوقتى باسم طره البلد عشان يتميز عن منطقتين تانيين انفصلوا عنه سنة 1932 و ههما طرة الحجاره و طرة الاسمنت. فى سنة 1941 عثر علما الاثار فى الحى ده على مناره قديمه فى جبل طره فيها مخطوطات بتتضمن تفسير للكتاب المقدس من القرنين اربعه و خمسه.
الفجاله : موقعه بين شارع كلوت بك و حى الظاهر فى جنوب شارع رمسيس ، الفرنساويه كانوا اول اللى نظموا شارع الفجاله.
مسطرد : اسمه الأصلى ” منية صرد ” لكن الاسم اتحرف فى العصر العثمانى . كان فيه سرايا صغيره لمرات الخديوى عباس حلمى التانى.
البساتين : فى جنوب القاهره ، كان اسمه زمان بساتين الوزير. البساتين دى بتتنسب للوزير ابو الفرج محمد و كانت موجوده فى شرق بركة الجيش.
المراجع
المقريزي : المواعظ و الاعتبار بذكر الخطط و الاثار، مطبعة الادب، القاهرة 1968م.
حسن الرزاز ، عواصم مصر ، دار الشعب، القاهرة 1999

بقلم دكتوره / مها العطار

كيف تبيع المشط لراهب أصلع
تقدم 3 بائعين ماهرين لوظيفة في شركة صينية كبيرة ، وعند المقابلة النهائية كانت قد تساوت نتائجهم ومؤهلاتهم.
فقرر الشخص الذي يقابلهم ان يمتحنهم ضمن تحدي وهو ( من يبيع أكثر عدد من الأمشاط – جمع مشط – لرهبان المعابد البوذية في ثلاثة أيام سيكون صاحب الوظيفة) .
بعد مرور ثلاثة أيام رجع البائعون لوضع تقريرهم على طاولة الشركة العظيمة كما يلي:
البائع الأول،
“لقد بعت مشطاً واحداً. بعد ان اهانني الرهبان بتهمة السخرية منهم، اصابني الاحباط وانسحبت من المعبد، وفي طريق العودة وجدت احد الرهبان الصغار يحك راسه بسبب الحساسية، فاقنعته ان المشط الخشبي يساعده في الحكاك، وعليه فاشترى الراهب هذا المشط الوحيد”.
البائع الثاني،
ضحك البائع الثاني على قصة البائع الاول، وقال لقد بعت 10 أمشاط، فابتسم صاحب الشركة وقال : “هذا مثير، قل لنا كيف بعتهم”. فقال البائع الثاني : ” لقد لاحظت ان الزوار للمعبد يصلون بشعر منكوش من قوة الرياح التي تواجههم في طريقهم الى المعبد، فاقنعت الراهب ان يضع مجموعة من الأمشاط للزوار لكي يمشطو شعرهم قبل دخول المعبد لاظهار الاحترام خلال زيارتهم للمعبد”.
البائع الثالث،
توجهت النظرات كلها للبائع الثالث لمعرفة هل سيخرج من المنافسة ام سيكون هو من حصل على الوظيفة، ليقاطع الانتظار سؤال صاحب الشركة : “قل لنا كم مشطاً بعت؟”.
ليجيب بكل ثقة : ” لقت بعت الف مشط”،
عم الذهول وجه الجميع ليقول صاحب الشركة: “امتعنا بقصتك”.
فقال البائع الثالث: ” قصدت المعلم لأكبر المعابد البوذية، وشكرته لما يقدمونه للناس في هذا المكان ذا القدسية بالنسبة للزوار، وكان صاحب كرم وابلغني بانه يود شكر الزوار لدعمهم واخلاصهم بالعبادة، فاقترحت عليه تذكاراً يحمل مباركة بوذا، وعرضت له المشط الخشبي والذي قمت مسبقا بحفر كلمات من تعاليم بوذا عليه، وقلت له ان زوار المعبد سيستخدمون المشط يوميا وسيكون بمثابة تذكير يومي للقيام بالاعمال الصالحة.
فاعجب الراهب الكبير بالفكرة، وطلب الفا من هذه الأمشاط المباركة”
قاطعه احد البائعين ليقول: ” انها ليست سوى ضربة حظ”، ليرد عليه صاحب الشركة : ” لم يكن الامر كذلك، فانه صاحب خطة وهي التي دفعته للحفر على المشط قبل المضي بعملية البيع، فحتى لو لم يرغب هذا الراهب بشرائه لكان اشتراه راهب اخر”.
وأكمل البائع الثالث قائلا:
ليس هذا فقط، وانما عدت للمعبد البارحة لأطمئن على الراهب، والذي قال لي ان العديد من الاصدقاء والاهل يطلبون المشط المبارك، وان عدد الزوار بازدياد وكلهم يسالون عن المشط، ويقدمون للمعبد تبرعات كريمة وكبيرة.
ووازدادت شهرة المعبد وانه يريد تسجيل طلبية اخرى اكبرمن الاولى.
الخلاصة:

١- اذا حللت احتياجات العميل و استخدمتها فسوف يشترى منتجك.

٢- اذا فهمت ظروفه جيداً سوف تحقق منه ربح جيد.

٣- أما اذا استطعت ان تجعل منتجك جزء من استراتيجيته بمبدأ win-win فستصبح شريكا.

كان في بوست من فترة طويلة كانت كاتباه بنت بتحكي إن مامتها كانت قاعدة تعمل محشي وأذان العصر أذّن فقامت تصلي قبل ماتكمل المحشي، وماتت وهي بتصلي!
البنت لما بَصّت على حلّة المحشي بعدين اكتشفت إن مامتها كان باقيلها آخر سطر بس وتخلص الحلّة، وكانت متأثرة جدا بإعتبار إن آخر سطر في حلّة المحشي بتبقى الواحدة مننا عايزة تخلّصه وتخلص بقى من وجع الدماغ بتاع المحشي وتغسل إيدها كده وتفوق
البنت بروزت فكرة البوست في نهايته بطريقة تهزك، إن لو مامتها كانت قررت تخلص المحشي الأول وبعدين تصلي كانت ماتت وهي بتعمل محشي، فرق شاسع بين الموتة دي ودي، فرق شاسع لما تُبعث على ما ماتت عليه

البوست ده من ساعة ماقريته معلّم معايا جدا، فكرة لحظية القرار، بساطة الاختبار، عادية الموقف!
إنك ممكن تمر بمواقف زي دي كتير جدا وماتلفتش نظرك أصلا..
هخلص آخر حبة محشي وأقوم أصلي
هكمل آخر ورقة في الملزمة وأقوم أصلي
هبعت الإيميل ده بس وأقوم أصلي
هغير للبيبي وأقوم أصلي
هكمل كوباية الشاي دي وأقوم أصلي

من ساعتها وانا كل ما أسمع الأذان، أفتكر الموقف، واستوعب خطورة الاختبار، فأسيب اللي ف إيدي وأقوم أصلي..

ده الدرس الأول
تاني درس بستشعره من القصة دي
إن الأم الجميلة الطيبة الي ماتت موتة نتمناها كلنا دي، أثر فعلها البسيط امتد لِمَ بعد مشهد وفاتها، امتد لحد ما أثّر في حياة ناس عمرها لا شافتها ولا عرفتها، لكنها اتعلمت منها بعد وفاتها، سبحانه اللطيف الخبير، اللي جعل لحظة اختيارها وصِدق نيتها سبب في صدقة جارية أودعتها في نفوس كتير من بعدها
جايز نتعلم إنك لو ركزت مع كل موقف وأخلصت فيه نيتك لله بالشكل ده، ربنا هيجازيك فوق الأجر أجور كتير ماكانتش تخطر على بالك

ونرجع ونقول مَن عاش على شيءٍ – غالبًا- مات عليه، فعِش لله يجعل لك أسعد أيامك يوم تلقاه?

بقلم دكتور / جاهين صديق

قبل ماندخل فى اشكالية الخلاف بين الدين ونظرية التطور ..
شايف اننا ناخد فكرة بسيطة عن ايه هى نظرية التطور .. ومين هو ” داروين “

تشارلز دارون ( 1809 – 1882 ) ..
عالم حيوان وتاريخ طبيعى انجليزى .. والده كان طبيب ..
درس تشارلز فى جامعة كامبريدج بكلية اللاهوت .. وكان بيعد نفسه ليصبح رجل دين فى خدمة الكنيسة .. لكنه قام برحلة بحرية سنة 1831 الى امريكا الجنوبية لمدة خمس سنوات .. غيرت اتجاهاته وكانت نقطة تحول فى حياته .. انشغل خلالها بدراسة النباتات والقشريات والحيوانات والطيور والحفريات التى رآها خلال رحلته.
وتحول الى عالم أحياء وجيولوجيا .. وعاد الى لندن ورأسه محمل بالأسئلة :

• ليه عنق الزرافة طويل ؟؟ أم يكون استطال مع مرور الزمن للوصول الى اعلى قمم الاشجار ؟
• ليه الارانب اللى بتلعب على التلج لونها أبيض ؟ ولا هى اكتسبت اللون ده علشان تقدر تختفى من الثعالب؟
• ليه طائر البنزون منقاره بيختلف بإختلاف المكان اللى بيعيش فيه ؟
• ليه ” الماموث ” المنقرض ( اللى شبه الفيل ) جلده السميك متغطى بشعر ؟ ولا هو اكتسب الشعر ده مع بدء العصر الجليدى ؟
  ومع هذة الأسئلة .. ألف سؤال وسؤال .. التى تحولت بالدراسة والتنقيب .. إلى صفحات كتابه المتفجر ” أصل الأنواع” ونظرية التطور ..
  وان كل انواع المخلوقات الحيه من اصل واحد .. وكل الكائنات الحية تطورت من خلية واحدة تكاثرت الى خلايا عديدة ..
  وان الكائنات الحية تكونت فى البداية من اتحاد جزئات الأكسجين مع جزيئات الهيدروجين وكونت الماء .. وعلى مدار ملايين السنين وعبر العصور الجيولوجية ومع تفاعل الماء مع العناصر الكيميائية الموجودة فى التربة .. حدثت طفرات تولد من خلالها الكائنات الحية وحيدة الخلية واللى تنوعت فى اشكالها وانواعها .. ومنها بدات المملكة النباتية عن طريق الطحالب .. وتنوعت الممملكة النباتية وترقت الى النباتات العليا .. ثم الى المملكة الحيوانية .
  والحفريات التى وجدت تدل على هذا التسلسل البيولوجى للكائنات الحية .. بمعنى انه وجدت حفريات لكائنات أولية وحشرات فى طبقات الارض السفلى ( وهى تدل على عصور قديمة ).. وكلما اتجهنا للأعلى وجدنا حفريات لكائنات أعلى حتى وصلنا الى الطبقات العليا من الارض وجدت حفريات الكائنات العليا . ده بالاضافة الى تطور العلم والقدرة على الوصول الى عمر الحفرية بواسطة التحليل الاشعاعي ونظرية ” عمر النصف ” للنظائر المشعة زى اليورانيوم والكربون.
  و ان الطريقه اللى بتسبب التغييرات او تطور المخلوقات الحيه اسمها:
  ” الاختيار الطبيعي Natural Selection ” والبقاء للاصلح ..
  والكائن اللى بينجح فى التكيف مع البيئه يستطيع تغيير جيناته .. ويورث الجينات الجديدة للجيل اللى بعده .
  والكائنات التى لم تستطع التكيف مع البيئة بتقل قدرتها على البقاء .. عشان كده ممكن تنقرض.

ثم ألف داروين عام 1871 كتاب “ظهور الإنسان” .. اللى شرح فيه تطور الانسان من أسلاف الكائنات الحية التى نشأت وتطورت تدريجيا من المادة غير الحية في مرحلة مبكرة من التاريخ الجيولوجي للأرض .. وأن كل العوامل التي ساعدت على ظهور الكائن الحي لأول مرة ما زالت موجودة الآن .. إلا أن الصدفة وحدها هي التي جمعت عناصر الأمونيا وأملاح الفسفور والضوء والحرارة والكهرباء لتكوين مركب البروتين .
وأضاف أن الأنواع لم تنشأ بشكل منفصل أو مستقل عن بعضها البعض .. وأن الإنتخاب الطبيعي كان هو العامل الرئيسي وراء التغيير وبأن الأنواع تتفرع من أصل وسلف مشترك.

باختصار كدة .. الكون بدأ من اتحاد جزيئات الاكسجين مع الهيدروجين .. لتكوين الماء .. ثم بعد الاف السنين اتحدت الماء مع العناصر الموجودة فى التربة مع بعض العوامل الخارجية لتكوين البروتين .. وبعد الاف السنين تكونت الكائنات وحيدة الخلية .. – وعبر ملايين السنين – تكونت الكائنات الاولية متعددة الخلايا .. ومنها الى الطحالب والدخول فى المملكة النباتية .. وتطورت المملكة النباتية الى النباتات العليا .. ومنها الى المملكة الحيوانية .. ومنها الى الزواحف إلى الطيور إلى الثدييات إلى الحيوانات العليا ومنها القرود والشامبانزى ومنها الى الانسان البدائى “الهومو إركتوس” شبه انسان منتصب القامة ..
ثم الى إنسان ” النياندرتال ” .. ثم الى ” هومو سابيانس ” وهو الانسان العاقل بشكله الحالى .

وطبعا بمجرد ظهور هذا الكتاب .. تم اتهامه من قبل الكنيسة ب ” الهرطقة ” ..
وبمجرد وصول هذة الافكار لمنطقتنا الشرقية .. تم اتهامه بالكفر والزندقة من قبل جميع الديانات ( الاسلام والمسيحية واليهودية ).
لان نظرية داروين .. بتنفى نظرية ” الخلق المنفرد ” لآدم الدينية .. وخلق الكون فى ستة ايام .. وتنفي خلق الله المباشر لآدم على صورته .
وطبعا الحديث عن كيفية نشأة الخلية الأولى التي دُبت فيها الحياة ( صدفة أو عن طريق الطفرة ) مش موضوعنا .. وفى نفس الوقت لم يكن يشغل دارون .. ولازال الجدل قائمًا بين المؤمنين .. وبين الملاحدة الذين يقرون أنها نشأت نتيجة تفاعلات كيميائية .. أو ممكن تكون نتيجة مجيئها على نيزك من خارج كوكب الأرض .. على أية حال ده مش موضوعنا.

لكن اللى شاغلنا هو موضوع تطور الكائنات ..
النظرية ب تؤكد بأننا والقردة ننتسب لجد واحد .. على الرغم بأن التاريخ المشهود والمكتوب ومن أكثر من سبعة آلاف سنة لغاية النهاردة .. لم يشهد ولا حتى حالة واحدة على تحول قرد لإنسان .

وبالرغم من وجود الكتير من الحلقات المفقودة داخل نظرية التطور .. وظهور العديد من النظريات فى الغرب الرافضة لنظرية التطور .. يطل علينا السؤال الأهم :
هل نظرية التطور مجرد تصور خاطئ وافتراضات وهمية ؟؟ ..
ولا هى نظرية علمية صحيحة وحقيقة لم تكتمل معالمها ..

ولكن نفسر بإيه التقارب الشديد بين القردة العليا زى الشامبانزى وبين الانسان .. فى تركيبه العضوى وجهازه الهيكلي العظمي وجهازه العضلى وجهازه العصبى وجهازه الهضمي والأوعية الدموية .. وحتى فى كيمياء الدم .. والتكوين الجنيني بالاضافة الى التشابهة الكبير على مستوى “الجينوم” .

ونفسر ب إيه .. وجود بقايا ومخلفات من عصور قديمة داخل جسد الإنسان الحالى ..
توجد أعضاء داخل جسد الإنسان .. كانت ليها استخدام زمان .. لكن مع مر العصور ضمرت وتعطلت وظائفها .. وأصبحت بلا فائدة .. زي الزائدة الدودية موجودة فى جهازنا الهضمى ومالهاش أى دور في عملية الهضم .. ولكن تفترض نظرية التطور انه كان ليها دور في عصور قديمة .. لما كان الانسان بيعتمد فى أكله على النباتات فقط .
وعضلات الأذن والتي تساعد على تحريك الأذن واللى ما زالت موجودة عند الكلب والأرنب .. لسة موجودة عندنا ومالهاش اى لازمة .
وضرس العقل والذي لم يعد متناسبًا مع حجم الفك الحالي للإنسان .. وبيعمل مشاكل اول ما يطلع ونضطر نشيله .. وعلي فكرة درس العقل بدأ ينقرض وحوالي ٣٠٪؜ من البشر مش بيطلع لهم درس العقل.
اللى بيشكك فى نظرية التطور لان ينقصها الكتير من الاثباتات .. زى اللى بيشكك فى نظرية الجاذبية لانه ماشافهاش ..

طب ما احنا سلمنا بوجود الإلكترون و البروتونات جوه الذرات .. قبل ما يظهر الميكروسكوب الالكترونى ..
و بنقدر نقيس عجلة الجاذبية وشحنة الالكترون وكتلة البروتون ..
التطور في حد ذاته حقيقة زيها زى نظريات الانفجار العظيم ( البيج بانج ) ..ونشوء النجوم .. وكتلة الإلكترون .. حاجات مش لازم نشوفها بعنينا .. بس بنعرفها بقرائنها وأدلتها اللى كلها بتصب فى نفس التصور .
أبسط مثال ممكن تشوفه للتطور هو مناعة البكتريا للمضادات الحيوية .. البكترياية اللي كان أى مضاد حيوى يقتلها .. أصبح فى ظرف شهور أو سنين قليلة نفس المضاد الحيوي مش بيأثر فيها .. وبيكون عندها مادة وراثية جديدة وبيحصلها ” انتخاب طبيعي” لما البكتريا الحساسة بتموت وبتفضل البكتريا المقاومة .. دى كائنات حية جديدة .. بصفات مختلفة ومادة وراثية مكانتش موجودة عند اسلافها .. إتكونت وسادت فى ظرف شهور أو سنين قليلة .. وانتجت جيل جديد مقاوم لنفس المضاد الحيوي .
التطور بيحتاج آلاف السنين بسبب تعقد تركيب الكائنات العليا .. ولكن إذا نظرنا للفيروسات مثلًا .. نلاقيها في تطور مستمر .. وده بسبب بساطة تكوينها .. وابسط مثال ” كوفيد-19″ .. ازاى ماكانش موجود قبل كدة وظهر السنة اللى فاتت بس .. حتى وان قلنا انه كان موجود فى الحيونات وظهوره كان بسبب انتقاله للانسان .. طيب شايفين التطور اللى حصل للنوع نفسه .. فى خلال ست شهور بين الموجه الاولى والتانية .. فيروس مختلف تماما .. قدر يطور نفسه .. ويهاجم بشكل جديد .
التطور مثبت جينيا .. علم الأحياء اصلا اسمه “علم التاريخ الطبيعي” .. ده تاريخ مش محتاج انك تشوف الواقعة بعينك علشان تصدقها ..
صناعة الأدوية كلها قايمة على التطور .. و ما كناش حنقدر نجربها على الحيوانات من غير ما نفهم التطور و نعرف اي حيوان نجرب عليه .. و اي حيوان نستخرج منه المادة الفعالة علشان نصنع منها ادويتنا .

وأخيراً .. شئنا أم ابينا .. الواقع والعلم بيقول ان نظرية التطور حقيقة مثبتة مسلم بيها .. وهى الاقرب للصحة بالرغم من قصورها فى بعض حلقاتها المفقودة .

الموضوع كبر مني .. وأصبح محتاج بوست تالت .. وهو الأهم .. ونشوف إشكالية الدين مع التطور .
نلتقى غدا .. محتاج آرائكم وتفاعلكم ..
دمتم بخير .