طبطب.. اجبر الخواطر ..قول كلمه حلوة للي حواليك ..حاول متزعلش حد منك
خلي كل اللي يقرب منك يقولك عليك انك نعمه في حياته
الكلمه الحلوة مش بتتنسي مهما طال الزمن زيها زي الكلمه الوحشة بالظبط ..
خليك انت الحلو اللي في حياة اللي حواليك ..
علشان يوم ما ربنا يأخد امانته ..الناس تقول ربنا يرحمه كان لسانة حلو وجابر بالخواطر ..الكلمه دي هي اللي هتنفعك وانت بين ايدين ربنا ..
ايااااك تنسي خلي قلبك مليان حب وخير وحنية ومتستناش مقابل من حد لان المقابل هتلاقيه عند الاحسن من الكل رب العباد ..

نشر ثقافة الجودة..

فريق الجودة مش موجود في أي مؤسسة علشان يهاجم الناس، هو الموضوع مش معركة بين حزبين، بالعكس
فريق الجودة في أي مؤسسة المفروض انه مكون أصلا من العاملين بالمؤسسة دي، اللي هما أكثر ناس دراية بإجراءات العمل داخل أقسام المؤسسة..
بسمع كتير من ناس “أنا عايز أشتغل في (مكتب) الجودة “
الحقيقة الجملة دي بتستوقفني جدا، هو عمليا مفيش حاجة اسمها مكتب الجودة، و الجودة أبدا لم تكن علم منفصل، الجودة ما هي إلا القيام بكل خطوات و إجراءات العمل، طبقا للقوانين أو المعايير و المراجع المتفق عليها دوليا أو محليا..
لو بتعمل ده و تطبقه، انت كدة شغال في الجودة، مش محتاج تدخل المكتب علشان تبقي ضمن فريق الجودة..
حتي الإجراءات التي تتضمن تصميم مؤشرات الأداء و أدوات متابعتها و احصائياتها و مشاريع التحسين، برده مشتركة بين كل العاملين بالمؤسسة..
مدير الجودة مش هيحط مؤشرات أداء الا بناءا علي الإجراءات ال critical و ثغرات المشاكل، و دي مش هيعرفها من غير اللي ايده في الشغل..
المراجعات الداخلية اللي بيقوم بيها فريق الجودة ليس الغرض منها تصيد الأخطاء زي ما بعض الناس فاهمة، لا طبعا، ده بيساعدك تشوف مشاكلك علشان تحلها ..
و المراجع الداخلي ليه مواصفات و مينفعش أصلا ينتقد حد، دي في حد ذاتها مخالفة لاجراءات المراجعة الداخلية..
مينفعش المراجع الداخلي ميبقاش قاري و ملم بإجراءات العمل داخل القسم اللي بيراجع عليه، و يطلع مخالفات علي هواه، هو بيراجع بناءا علي قوائم مصممة و متراجعة من اللي ايده في الشغل برده، الموضوع مش معركة، احنا بنساعد بعض و بنسهل الشغل علي بعض ..
أتمني يكون الكلام مفيد ..
شكرا لوقتكم..

بقلم د. محمود عمرون

للأسف الموجة التانية للكورونا ظهرت وبدري عن المتوقع ،، كلنا كأطباء كنا عارفين إنها حترجع ف نهاية سبتمبر مع بداية فصل الخريف زي موجة الإنفلونزا كده لكن كالعاده الفيرس فاجئنا كلنا ورجع بشراسه ف دول كتير فتحت جزئيا وسمحت بالعودة للحياة الطبيعية زي البرازيل وأسبانيا وأمريكا ودلوقتي في مصر .. المشكلة إن الأعراض معادتش بس فقدان حاسة شم وتذوق وشوية حرارة وكحه ناشفه وتعدي لا ،، دلوقتي أعراض تانية كانت موجودة على خفيف بدأت تظهر بقوة زي إضطرابات الجهاز الهضمي نتيجة تجلطات ف الأوعية الدموية المغذية للأمعاء ينتج عنها مغص شديد وقئ وإسهال وجلطات ف أماكن متفرقة ،، فيرس كورونا معدش مصنف عالميا كفيروس تنفسي يصيب الرئتين ولكن الأبحاث أظهرت انه يصيب الدم بشكل مباشر وبيسبب خروج الحديد من كرات الدم الحمراء وبيرسبه على العضلات وده اللي بيسبب إحساس تعب العضم والعضلات والهمدان الشديد اللي بيحصل ف أول العدوى وبيصيب الصفايح الدمويه وبيسبب تجلطات ف الرئه والجهاز الهضمي وأماكن تانية زي المخ وبيسبب سكتات دماغية وده طبعا سبب رئيسي في ظهور حالات الموت المفاجئ وخصوصا بين الشباب زي مابنشوف اليومين دول وبيسبب كمان نقص ف كرات الدم البيضا وضعف شديد ف المناعه طبعا ،، وللأسف بيصيب الأطفال كمان بنسبة كبيره وأمريكا من يومين سجلت ٩٧٠٠ حالة طفل مصاب لأنهم رجعوا فتحوا المدارس تاني ،،
للأسف الأعداد ف تزايد كبير وإستقبال المستشفيات بقي بيستقبل أضعاف عدد الحالات يوميا بعد فتره من الهدوء النسبي وده اللي خلي وزارة الصحه ترجع تفتح ٢١ مستشفى عزل كانوا اتقفلوا من كام أسبوع لإستئناف العمل تاني بيهم ،، خلوا بالكم يا جماعة بلاش تجمعات وبوس وسلامات وزحمة ونفس .. الكمامة بتحمي الي حد ما وطبعا الكحول والتعقيم والتباعد الآمن .. مش عايزين ندخل ف حظر تاني الله يهديكم البلد كلها حالها واقف وماصدقنا تمشي شويه ..
ربنا يعديها على خير ويكملها بالستر .. الله المستعان ?